rgya gar skad du: āryākṣayamatinirdeśa nāma mahāyānasūtra. bod skad du: ’phags pa blo gros mi zad pas bstan pa źes bya ba theg pa chen po’i mdo. bam po daṅ po: saṅs rgyas daṅ byaṅ chub sems dpa’ daṅ ’phags pa ñan thos daṅ raṅ saṅs rgyas thams cad la phyag ’tshal lo.

rgya gar skad du: ārya akṣa ya ma ti nirde śa ṭī kā, bod skad du: ’phags pa blo gros mi zad pas bstan pa rgya cher ’grel pa.
tshig gi mṅa’ bdag ’jam dpal gźon nur gyur pa la phyag ’tshal lo.
ston pa’i gtso bo saṅs rgyas bcom ldan daṅ, bstan pa ’jug byuṅ dam pa’i chos mchog daṅ, ’chad du ’jug daṅ ’chad pa ’khor gyi gtso, śā ri’i bu daṅ blo gros mi zad daṅ, gźan yaṅ mtshan smos ’di dag gis mtshon pa’i, ’gro ba gsum gyi bla ma dkon mchog gsum, phyogs dus kun na bźugs pa ma lus la, spyi bo sa la gtugs te phyag ’tshal nas, spyod pa gaṅ gis ’phags rnams ṅes ’byuṅ tshul, thabs mkhas ’dus pa chen po ṅes pa ’di, bdag pas blo źan rnams la phan gdags phyir, bla ma’i luṅ las brten te tshig tsam dbye.
’di la dgos pa daṅ, brjod par bya ba daṅ, ’brel pa daṅ, bsdus pa’i don daṅ, tshig gi don rnam pa ’di lṅas bśad par bya’o. de la mdo sde’i dgos pa ni mi gnas pa’i mya ṅan las ’das pa ste, de thabs ’dis thob par byed pa’i phyir ro. brjod par bya ba ni mi zad pa brgyad cu ste: de la mi zad pa brgyad cu ni sems bskyed pa daṅ, bsam pa daṅ, sbyor ba daṅ, lhag pa’i bsam pa daṅ, pha rol tu phyin pa drug daṅ, tshad med pa bźi daṅ, mṅon par śes pa lṅa daṅ, bsdu ba’i dṅos po bźi daṅ, so so yaṅ dag par rig pa bźi daṅ, rton pa bźi daṅ, bsod nams kyi tshogs daṅ, ye śes kyi tshogs daṅ, byaṅ chub kyi phyogs sum cu rtsa bdun daṅ, źi gnas daṅ, lhag mthoṅ daṅ, gzuṅs daṅ, spobs pa daṅ, chos kyi mdo bźi daṅ, bgrod pa gcig gi lam du gyur pa daṅ, thabs la mkhas pa’o. ’brel pa ni de gñis ’brel pa ste, thabs daṅ thabs can du gyur pa’i phyir ro. bsdus pa’i don ni rnam pa bcu dgu ste: gleṅ gźi daṅ, gleṅ bslaṅ ba daṅ, chos rnams kyi gźi daṅ, de’i ’bras bu daṅ, bdag daṅ gźan gyi don byed pa daṅ, sñiṅ brtse ba daṅ, yo byad daṅ, yoṅs su smin par bya ba’i mthu daṅ, bstan par bya ba’i mthu ’thob pa daṅ, de’i thabs śes pa daṅ, tshogs kyi lam daṅ, sbyor ba’i lam daṅ, mthoṅ ba’i lam daṅ, sgom pa’i lam daṅ, der sbyor bar byed pa daṅ, luṅ bstan pa thob pa daṅ, de thob par bya ba rnam par gźag pa daṅ, raṅ byaṅ chub daṅ, chos kyi ’khor lo bskor ba ste; de la bsdus pa’i don bstan pa ni mdo sde’i don bde bar zin par bya ba’i phyir ro. de la ’di skad bdag gis thos pa źes bya ba nas brtsams te, tshad med brjod du med pa’i byaṅ chub sems dpa’ daṅ thabs gcig go źes bya ba yan chad kyis gleṅ gźi bstan to, de nas bcom ldan ’das byaṅ chub sems dpa’i spyod pa la ’jug pa źes bya ba nas brtsams te, chos ñan pa’i phyir ’dus so źes bya ba yan chad kyis gleṅ bslaṅ ba bstan to, de nas tshe daṅ ldan pa śa ra dva ti’i bus źes bya ba nas brtsams te, ’di ni byaṅ chub sems dpa’ rnams kyi sems mi zad pa’o źes bya ba yan chad kyis chos rnams kyi gźi bstan to, gźan yaṅ śa ra dva ti’i bu byaṅ chub sems dpa’ rnams kyi bsam pa mi zad pa źes bya ba nas brtsams te, ’di ni lhag pa’i bsam pa mi zad pa’o źes bya ba yan chad bsam pa daṅ, sbyor ba daṅ, lhag pa’i bsam pa gsum gyis de’i ’bras bu bstan to, de nas tshe daṅ ldan pa śa ra dva ti’i bus źes bya ba nas brtsams te, sṅon gyi sbyaṅs pa byas pa stoṅ phrag sum cu rtsa gñis mi skye ba’i chos la bzod pa thob pa yan chad pha rol tu phyin pa drug gis bdag daṅ gźan gyi don byed pa bstan to, de nas byaṅ chub sems dpa’ blo gros mi zad pas źes bya ba nas brtsams te, btsun pa śa ra dva ti’i bu byaṅ chub sems dpa’ rnams kyi btaṅ sñoms mi zad pa źes bya ba yan chad kyis sñiṅ brtse bstan to, gźan yaṅ btsun pa śa ra dva ti’i bu źes bya ba nas brtsams te, byaṅ chub sems dpa’ rnams kyi mṅon par śes pa lṅa mi zad pa źes bya ba yan chad kyis yo byad (4a) bstan to, gźan yaṅ btsun pa śa ra dva ti’i bu źes bya ba nas brtsams te, bsdu ba’i dṅos po bźi mi zad pa źes bya ba yan chad kyis yoṅs su smin par bya ba’i mthu bstan to, gźan yaṅ btsun pa śa ra dva ti’i bu źes bya ba nas brtsams te, so so yaṅ dag par rig pa bźi mi zad pa źes bya ba yan chad kyis bstan par bya ba’i mthu ’thob pa bstan to, gźan yaṅ btsun pa śa ra dva ti’i bu źes bya ba nas brtsams te, rton pa bźi mi zad pa źes bya ba yan chad kyis de’i thabs śes pa bstan to, gźan yaṅ btsun pa śa ra dva ti’i bu źes bya ba nas brtsams te, bsod nams daṅ ye śes kyi tshogs mi zad pa’o źes bya ba yan chad kyis tshogs kyi lam bstan to, btsun pa śa ra dva ti’i bu źes bya ba nas brtsams te, ’di dag ni byaṅ chub sems dpa’ rnams kyi stobs mi zad pa’o źes bya ba yan chad kyis sbyor ba’i lam bstan to, gźan yaṅ btsun pa śa ra dva ti’i bu źes bya ba nas brtsams te, byaṅ chub kyi yan lag bdun no źes bya ba yan chad kyis mthoṅ ba’i lam bstan to, gźan yaṅ btsun pa śa ra dva ti’i bu źes bya ba nas brtsams te, lam mi zad pa’o źes bya ba yan chad kyis sgom pa’i lam bstan to, gźan yaṅ btsun pa śa ra dva ti’i bu źes bya ba nas brtsams te, źi gnas daṅ lhag mthoṅ mi zad pa’o źes bya ba yan chad kyis der sbyor bar byed pa bstan to, gźan yaṅ btsun pa śa ra dva ti’i bu źes bya ba nas brtsams te, gzuṅs daṅ spobs pa mi zad pa źes bya ba yan chad kyis luṅ bstan pa thob pa bstan to, gźan yaṅ btsun pa śa ra dva ti’i bu źes bya ba nas brtsams te, chos kyi mdo bźi mi zad pa źes bya ba yan chad kyis de thob pa rnam par gźag pa bstan to, gźan yaṅ btsun pa śa ra dva ti’i bu źes bya ba nas brtsams te, bgrod pa gcig pa’i lam mi zad pa źes bya ba yan chad kyis raṅ byaṅ chub bstan to, gźan yaṅ btsun pa śa ra dva ti’i bu źes bya ba nas brtsams te, thabs mi zad pa źes bya ba yan chad kyis chos kyi ’khor lo rab tu bskor ba bstan to.
tshig gi don ni bsdus pa’i don rig par bya ba’i phyir te, ’di skad bdag gis thos pa dus gcig na źes bya ba la sogs pa’i don rgyas par ston pa gaṅ yin pa’o.